Man sterf in pa se arms

2010-04-17 00:39
Maygene de Wee

Houtbaai

’n Jong man van Houtbaai het in sy pa se arms gesterf nadat hy vroeg gisteroggend wreed deur inbrekers in sy ouerhuis aangeval is waar hy rekenaarspeletjies gespeel het.

Mnr. Charles Griss, pa van die vermoorde mnr. Conrad Griss (23), was gister so bedroef dat hy skaars ’n woord kon uitkry.

In ’n gebroke stem het hy aan Die Burger gesê: “Vergewe my, asseblief, ek kan nie nou met julle praat nie.”

Conrad het omstreeks 02:00 in ’n vertrek op die onderste verdieping van sy pa se tweeverdiepinghuis rekenaarspeletjies gespeel toe hy onverwags deur inbrekers aangeval is.

Volgens ao. Tanya Lesch, ’n polisiewoordvoerder, het die inbrekers ’n ruit van die vertrek waar Conrad rekenaarspeletjies gespeel het, gebreek om toegang tot die huis te kry.

Conrad het vermoedelik opgespring en sy windbuks gaan haal om die inbrekers af te skrik.

Hulle het hom egter met ’n hamer aangerand en ook met ’n mes onder sy slaap gesteek.

Lesch het gesê Griss sr., wat op die boonste verdieping geslaap het, het wakker geword van sy seun se krete om hulp en die geluide van ’n worsteling.

Hy het teen die trappe afgestorm, maar die inbrekers het deur dieselfde venster gevlug waardeur hulle toegang tot die huis gekry het. Daar is niks gebuit nie.

Griss sr. het vergeefs die bloeding aan sy seun se gesig probeer keer, wat kort daarna in sy arms dood is.

Conrad en sy pa het alleen in die huis gewoon. Sy ma, mev. Julia Griss, woon na verneem word in Pringlebaai en hy het ’n suster wat oorsee is.

Volgens Lesch is Conrad se windbuks, sowel as die hamer waarmee hy aangerand is, op die toneel gevind.

Die mes waarmee hy gesteek is, is nog nie gevind nie.

’n Vriend van Conrad wat homself net as Jacques voorgestel het, het gesê hy was “so lief soos ’n somerbriesie”. Hulle het mekaar langer as tien jaar geken.

“Conrad sou nooit enigiemand leed aangedoen het nie.”

Op Facebook het verskeie van sy vriende hul skok oor sy wrede moord uitgespreek.

Bonnie Emma Wenman het geskryf: “My hart gaan uit na Conrad en sy familie.”

Mnr. Martin Griss, Conrad se oom, skryf in ’n boodskap aan sy ma: “My diepste simpatie en hartseer oor die tragiese heengaan van my nefie, jou seun. Liefde.”

– Die Burger

Oprsprong:
http://www.dieburger.com/Suid-Afrika/Nuus/Man-sterf-in-pa-se-arms-20100416

One Response

  1. Dit is so sad n mense is nie eers meer vuilig in jou eie huis nie ek is regtig bang. staan saam en sluk jou trots in dus nie tyd om jou beter as ander te hou nie hoe meer hoe beter

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: