‘Hy was net ’n kind’

2009-09-26 00:44

Hilda Fourie

‘n Jong man is gister in sy ouerhuis buite Bronkhorstspruit doodgeskiet oomblikke nadat sy pa in sy slaapkamer geskiet is.

Mev. Jeanine Anderson moes toekyk hoe haar man, mnr. Robert Anderson (47), die eienaar van ’n boumaatskappy, twee keer in die maag geskiet word.

Oomblikke later het sy nog ’n skoot gehoor.

Dié skoot het die lewe van haar seun, Sheun (18), wat vir sy pa gewerk het, geëis.

Insp. Sanet Lourens, polisiewoordvoerder, het gesê ’n inbreker het gister omstreeks 01:00 deur ’n kombuisvenster van die Andersons se huis op ’n kleinhoewe by Wag-’n-bietjieskop, buite Bronkhorstspruit, geklim.

Volgens Lourens het die man reguit na die hoofslaapkamer geloop waar Anderson sr. en sy vrou geslaap het.

Volgens mnr. André van Staden, ’n familievriend, het Anderson sr. uit sy bed opgespring toe hy van die man bewus word.

Anderson sr. het glo net omgedraai om sy bril te kry toe die man hom twee keer skiet.

“Hy (die moordenaar) het langs die bed gestaan en die man twee keer in die maag geskiet,” het Lourens gesê.

“Mev. Anderson het op die bed gelê toe haar man geskiet is. Die man het niks aan mev. Anderson gesê of haar gevra om enigiets te doen nie.”

Volgens Lourens het die egpaar se seun van die skote wakker geword en is hy na sy ouers se slaapkamer toe.

Die moordenaar het net toe uit die kamer die gang ingestap en hom in Anderson jr. vasgeloop. ’n Stoeiery het in die gang uitgebreek en tot in die kombuis aangegaan. In die kombuis het ’n ander moordenaar Anderson jr. van agter in die bolyf geskiet. Hy is op die toneel dood.

Lourens het gesê die moordenaars het gevlug deur dieselfde venster waar hulle ingekom het. Net ’n skootrekenaar word vermis.

Anderson sr. is na die Bronkhorstspruit-hospitaal geneem vanwaar hy met ’n helikopter na die Steve Biko-hospitaal in Pretoria oorgeplaas is.

Hy is in ’n kritieke toestand in die hoësorgeenheid opgeneem.

“Hulle (misdadigers) voel niks vir ’n mens nie,” het Van Staden gesê.

“Die laaitie het pas 18 geword en was nog ’n kind. Dit is so sleg.”

Buiten sy ouers laat Anderson jr. ook ’n ouer broer, Robbie (19), agter. Hy was nie tuis ten tyde van die voorval nie.

* Volgens die polisie se misdaadstatistieke wat vroeër vandeesweek bekend gemaak is, het moorde en huisrooftogte in die Bronkhorstspruit-polisiewyk van April verlede jaar tot Maart vanjaar onderskeidelik met 110% en 104% toegeneem.

– Beeld

Oorsprong:Beeld
http://www.beeld.com/Content/Suid-Afrika/Nuus/1928/34ab57e58a4e488b84b2c023bc145f30/26-09-2009-12-44/%E2%80%98Hy_was_net_%E2%80%99n_kind%E2%80%99

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: